FUTBOL YANGILIKLARI

Фабрицио Романо трансфер хабарларини ёритишни тўхтатиши мумкин Фабрицио Романо трансфер хабарларини ёритишни тўхтатиши мумкин Машҳур инсайдер трансферлар бозоридаги фаолиятини ўзгартиришини маълум қилди. Футбол трансферлари бўйича дунёдаги энг машҳур инсайдерлардан бири Фабрицио Романо ёзги трансферлар ойнаси якунланганидан кейин ўз фаолиятини ўзгартириши мумкин. 33 ёшли италиялик журналист бу ҳақда LinkedIn саҳифасида маълум қилди. “Эҳтимол, энди трансферлар бозорида бугунги форматда ишламайман. Ёндашув ва қарашларимни ўзгартириш вақти келди. Бу ҳақда трансферлар ойнаси ёпилганидан кейин батафсилроқ гапираман. Бу даврдаги рақамлар ҳақиқатан ҳам ақл бовар қилмас даражада”, деб ёзди Романо. Романо ҳозирга қадар ижтимоий тармоқларида футболчиларнинг трансферлари, клублар ўртасидаги музокаралар ва келишувлар ҳақида тезкор инсайдерлик маълумотларини бериб келади. Унинг маълумотлари кўп ҳолларда трансферлар расмий эълон қилинишидан аввал пайдо бўлади. Италиялик журналист трансферлар ҳақидаги хабарларни ёритишда “Here we go” ибораси билан ҳам машҳур. Романо бу иборани одатда футболчининг янги клуби билан келишувга эришилгани аниқ бўлганидан кейин ишлатади. Goal нашри Романонинг LinkedIn’даги баёнотига таяниб хабар берган. Инсайдер ҳозирча журналистикани бутунлай тарк этишини айтмаган, балки трансферлар соҳасидаги ишлаш услуби ёки фаолият форматини ўзгартириши мумкинлигига ишора қилган. Романо ижтимоий тармоқларда катта аудиторияга эга. Унинг X платформасида 28,7 млн, Instagram’да 49,1 млн ва YouTube’да 3,24 млн обуначиси бор. Европанинг асосий чемпионатларида ёзги трансферлар ойнаси 1 сентябрда ёпилади. Шундан кейин Романо ўзининг кейинги режалари ҳақида батафсил маълумот бериши кутилмоқда.

Моуринью: "Реал" футболчилари эркаланиб кетган эди" Жозе Моуринью Netflix'да чиққан ҳужжатли фильмда жамоани бошқарганида "Реал" футболчилари эркаланиб кетгани ҳақида гапириб берди. "У ерда супержамоа бор эди, Касильяс унинг сардори ва энг яхши ўйинчиси эди. Аммо психологик жиҳатдан у ноқулай ҳолатда эди. Биринчи суҳбатимиз чоғида у менга: "Мен терма жамоа футболчилари учун қўшимча таътил кунларини сўраб келдим", деди. Иккинчи марта у машғулотларни бир соатга силжитишни сўради, чунки мен машғулотни бошламоқчи бўлган пайтда Мадридда тирбандликлар кўп бўларди. Учинчи марта эса улар меҳмонхонага боришни хоҳламасликларини, ўйин куни учрашиб, тўғри стадионга боришни афзал кўришларини айтди. Мен уларнинг эркаланиб кетганини тушуниб етдим", – деди шу ёзда "Реал"га қайтган португалиялик.

✅ Кун ўйинлари / 13 август 🇺🇿 Суперлига. 17-тур 19:00. Андижон — Нефтчи 19:00. Сурхон — Сўғдиёна 20:30. Бухоро — ОКМК 🇸🇦 Саудия Пролигаси. 1-тур 21:15. Абҳа — Ал Ҳазем 23:00. Ад Дирия — Ал Аҳли 23:00. Аш Шабоб — Ал Қодисия

Адейеми: «Ҳали ҳам Чемпионлар Лигасида ғалаба қозонишни орзу қиламан» «Барселона» футболчиси Карим Адейеми ўзининг энг катта орзуси ҳақида гапирди. — «Боруссия» билан Чемпионлар Лигаси финалида мағлуб бўлгансиз. «Барселона» билан бунинг реваншини оламан деб ўйлайсизми? — Албатта. Чемпионлар Лигасида ғалаба қозониш — менинг орзум. Мен бу мақсадга жуда яқин келгандим, аммо афсуски, ўшанда мағлуб бўлдик. Ҳали ҳам ушбу турнирда ғалаба қозонишни орзу қиламан. Мен ҳар куни айнан шу мақсад йўлида меҳнат қиламан, — деди Адейеми Mundo Deportivo нашрига берган интервюсида. Маълумот ўрнида, германиялик вингер ўтган ҳафта Дортмунднинг «Боруссия» клубидан каталонияликлар сафига келиб қўшилганди.

Гвардиола Моуриньо ҳақидаги сериалда ягона шарти бажарилмагани учун суратга тушмади 11 август куни Netflix стриминг сервиси Мадриднинг "Реал" клуби бош мураббийи Жозе Моуриньо ҳақида уч қисмдан иборат ҳужжатли сериални тақдим этди. "Барселона", "Бавария" ва "Манчестер Сити"ни бошқарган Хосеп Гвардиола суратга олиш жараёнида иштирок этишга тайёр эди, бироқ якунда лойиҳада кўриниш бермади. Лойиҳа режиссёри Джо Перлманнинг сўзларига кўра, фильм ижодкорлари испан мутахассисига интервью бериш таклифи билан мурожаат қилишган. Гвардиола рози бўлган, аммо битта шарт қўйган. "Ҳа, биз ҳақиқатан ҳам Пеп билан боғландик. У Жозенинг шахсан ўзи мурожаат қилиши шарти билан интервью беришга рози бўлди. Бунинг нима билан тугаганини тасаввур қилаверинг", — дейди Перлманнинг сўзларини келтирган "The Sun".

Роналду Мессининг мактубига изоҳ қолдирди: "Сени ва яқинларингни бағримга босаман, Лео. Сабр тилайман" Криштиану Роналду отасининг вафоти муносабати билан Лионель Мессининг оиласига ҳамдардлик билдирди. Хорхе Месси ўтган жума куни узоқ давом этган хасталикдан сўнг 68 ёшида ҳаётдан кўз юмди. Португалия терма жамоаси ҳужумчиси Мессининг инстаграмдаги марҳум отасига мактуби остидаги постга изоҳ қолдирди. "Бундай оғир дамларда сени ва яқинларингни маҳкам бағримга босаман, Лео. Сабр тилайман", – деб ёзди Роналду.

Леонинг отаси Хорхе Месси вафот этди Аргентина миллий жамоаси ҳужумчисининг отаси Хорхе 68 ёшида Росариодаги шифохонада ҳаётдан кўз юмди. Аргентиналик ҳужумчи Лионел Мессининг отаси Хорхе Месси 68 ёшида Росарио шаҳридаги шифохонада вафот этди. Бу ҳақда Аргентинанинг Infobae газетаси хабар берди. Хорхе узоқ вақт давомида касаллик билан курашиб келаётганди. Жаҳон чемпионатини Жазоир дарвозасига хет-трик (3:0) билан бошлаган Месси ўйиндан сўнг кўз ёшларини тия олмади. Интервюда у ўзининг бундай реакцияси спорт билан боғлиқ эмаслигини, балки бошидан кечирган оғир кунлардан келиб чиққанлигини айтди. Ўшанда Мессининг отаси жиддий касал эканлиги ҳақида маълумотлар пайдо бўла бошлаган, чунки у Аргентина терма жамоаси ўйинлари пайтида трибуналарда Лео оиласи билан бирга кўринмаган. Хорхе бугун тонгда маҳаллий вақт билан соат 04:00 ҳаётдан кўз юмгани хабар қилинди.

Моуринио Винисиусни лойиҳанинг асосий фигураларидан бири деб ҳисоблайди Мураббий ва футболчи Жаҳон чемпионти вақтидаёқ гаплашиб олишган. «Реал» бош мураббийи Жозе Моуринио жамоа вингери Винисиус Жуниорни лойиҳанинг асосий фигураларидан бири деб ҳисоблайди. AS маълумотларига кўра, португалиялик 63 ёшли мураббий клубнинг бразилиялик футболчи билан шартномани узайтиришида муҳим рол ўйнаган. Мураббий ва 26 ёшли вингер 2026 йилги Жаҳон чемпионати вақтида мулоқот қилишган. Улар ўртасидаги ўзаро тушуниш дастлабки кунларданоқ аъло даражада бўлган. Винисиус учун ўзининг муҳимлиги, қадри ва янги лойиҳада асосий рол ўйнашига бўлган ишонч жуда зарур ҳамда ҳал қилувчи аҳамиятга эга эди. Мураббий унга айнан шу ҳисни берди ва энди унга асосий таянч ўйинчиларидан бири сифатида ишонади. Моуринио ўзининг «Реал»ида Винисиус бўлишини хоҳлаган. У — мураббий ўйинни атрофида қуришни режалаштираётган футболчилардан бири. Жозе учун бразилияликнинг якка ўзи ўйин тақдирини ўзгартира олиши ва доимий тарзда ҳужумкор руҳда ҳаракат қилиши муҳим. Жозе олдидаги вазифа — Винисиуснинг 2024 йилдаги энг яхши версиясини қайтариш. Ўша йили у «Олтин тўп»ни қўлга киритишга яқин келганди. Шунингдек, мураббий жамоани ягона механизм каби ишлайдиган ҳолатга келтирмоқчи. Бунда вингер Винисиус ва ҳужумчи Килиан Мбаппе майдонда турли йўналишларда ҳаракат қиладиган икки алоҳида юлдуз эмас, балки бир-бирига уйғун тарзда ҳаракатланадиган футболчилар бўлиши керак.

Блаттер УЕФАни қўллаб-қувватлади: "Технологиялар ҳакамни алмаштириш учун эмас, унга ёрдам бериш учун керак" ФИФАнинг собиқ президенти Йозеф Блаттер УЕФАнинг ҳакамлик борасидаги ташаббусини қўллаб-қувватлади. Европа футбол ассоциациялари иттифоқи ВАРдан фойдаланиш бўйича тавсиялар берилган Clear Line платформасини ишга туширди: "Бизга характери бор ҳакамлар керак. Видеоассистент ўйинни бошқармайди, фақат аниқ хатоларда ёрдам беради". УЕФА ҳакамлар корпуси раҳбари Роберто Розетти қуйидагиларга аниқлик киритди: "Биз микроскопик вазиятларда аралашишдан қочишни хоҳлаймиз – бу футбол, PlayStation эмас. Улар фақат яққол хатоларда керак". "Бош ҳакам майдонда ягона обрў эгаси бўлиб қолиши керак. Мен УЕФАнинг ҳакамнинг ўйин вақтидаги қарорлар учун масъулияти ва обрўсини тиклаш ҳақидаги чақириғини тўлиқ қўллаб-қувватлайман. ВАР фақат яққол ва ҳал қилувчи хатолар содир бўлган ҳолларда аралашиши керак. Футболдаги технологиялар ҳакамни алмаштириш учун эмас, унга ёрдам бериш учун керак", – деб ёзди 90 ёшли швейцариялик.

«Арсенал» Винисиус трансфери амалга ошмагач, эътиборини Йилдизга қаратди «Ювентус» туркиялик вингер учун юқори нарх белгилаган. «Арсенал» «Ювентус» вингери Кенан Йилдизга қизиқиш билдирмоқда. Бу ҳақда Goal нашри La Stampa'га таяниб хабар берди. Манбага кўра, Винисиус варианти амалга ошмай қолганидан сўнг туркиялик юлдуз Лондон клубининг асосий нишонлари қаторига кирган. Бразилиялик футболчи «Реал» билан шартномасини узайтирди ва энди «тўпчилар» ҳужум чизиғига бошқа юқори даражали футболчи қидирмоқда. Асосий номзодлардан бири — сўнгги мавсумларда сезиларли ўсишга эришиб, «Ювентус»нинг муҳим футболчиларидан бирига айланган 21 ёшли Йилдиз. Бироқ Турин клуби футболчини оддий шартларда сотиш ниятида эмас. «Ювентус» музокараларни жиддий бошлаши учун «Арсенал» 100 миллион евродан анча юқори нарх таклиф қилишига тўғри келади. Йилдиз ўтган мавсумда А Серияда 36 ўйин ўтказиб, 10 гол ва 6 ассистни ўз ҳисобига ёздириб қўйган.